Foreldrakaffi miðvikud. 8. okt kl 20

Kæru foreldrar,

Í bréfi sem stjórn foreldrafélagsins sendi ykkur nú í skólabyrjun sögðum við ykkur frá því að Foreldrafélag Akurskóla hefur meðal annars það hlutverk að:

-         Vera samstarfsvettvangur foreldra sem eiga börn í skólanum.

-         Efla og tryggja gott samstarf foreldra og starfsfólks skólans.

-         Styðja heimili og skóla við að skapa nemendum góð uppeldis- og menntunarskilyrði.

Nú þurfum við, kæru foreldrar, að rísa upp og standa við þessi orð.  Glæsilegt skólahúsnæðið rúmar ekki fyrirhugaðan fjölda nemenda sem mun hefja skólagöngu á næstu árum. Þetta þýðir að það frábæra starf sem búið er að byggja upp og fram fer í Akurskóla kemur til með að eiga undir högg að sækja.

Hvað er til ráða?

Eigum við að sætta okkur við að ákveðnum árgöngum verði keyrt yfir í aðra skóla? Eigum við að sætta okkur við að skólalóðin fyllist af færanlegum skólastofum? Eigum við að krefjast þess að byrjað verði á framkvæmdum við Dalsskóla?

Hvað vilt þú?

Okkur í stjórn foreldrafélagsins langar til að bjóða ykkur foreldrar góðir, í kaffi og með því miðvikudagskvöldið 8. október kl. 20:00-22:00.

Við það tækifæri viljum við kynna fyrir ykkur hvaða áform eru uppi á borðum fræðsluyfirvalda til að leysa áðurnefndan, bráða húsnæðisvanda Akurskóla.

Með þessu langar okkur til að skapa vettvang þar sem við, foreldrar, getum hist og rætt málin, séð framan í aðra foreldra og jafnvel kynnst nýjum!

Stillum saman strengina, nýtum sterka rödd okkar og tölum saman.

Kæru foreldrar, kíkið í kaffi í skólann okkar!

Bestu kveðjur

Stjórn Foreldrafélags Akurskóla