Vorferð 1. bekkur

Í gær þann 8. maí fór 1. bekkur í vorferðalag. Leiðin lá að sveitabænum Bjarteyjarsandi í Hvalfirði en þar er stunduð sauðfjárrækt og ferðaþjónusta. Þar tók Þórdís á móti okkur kl. 10.00 en krakkarnir byrjuðu á því að borða nestið sitt. Síðan lá leiðin í fjárhúsin þar sem krakkarnir sáu hunda, hesta, kindur, lömb og kanínur. Krakkarnir fengu að halda á nýfæddum lömbum, klappa kanínunum og hnoðast í heyinu og allt vakti þetta mikla lukku hjá börnunum. Að þessu loknu gekk hópurinn niður í fjöru og buslaði í sjónum og skoðaði krabba og það voru ansi margir sem komu blautir úr fjörunni enda mikið fjör. Í hádeginu var boðið upp á grillaðar pylsur og svala og rann það ljúft niður í svanga kroppa. Hundarnir á bænum höfðu mikinn áhuga á börnunum. Að lokum var leikið sér á leikvellinum fyrir neðan bæinn og í gömlum traktor sem er á hlaðinu. Við vorum komin aftur heim um þrjú-leitið og krakkarnir voru sælir og ánægðir með sveitaferðina enda skemmtu þau sér öll vel og voru skólanum okkar til sóma.